హైదరాబాద్‌లో రెండ్రోజుల పాటు నీటి సరఫరా బంద్ కానుంది. కృష్ణా డ్రింకింగ్ వాటర్ సప్లై ప్రాజెక్ట్ ఫేజ్-2కి సంబంధించి 1600 ఎంఎం డయా పైప్‌లైన్‌కు ఫిబ్రవరి 4,5 తేదీల్లో మరమ్మతు చేయనున్నారు. దీంతో బాలాపూర్‌, మేకలమండి, మారేడ్‌పల్లి, తార్నాక, లాలాపేట్‌, బుద్ధనగర్‌, హస్మత్‌పేట, ఫిరోజ్‌గూడ, భోలక్‌పూర్‌ తదితర ప్రాంతాల్లో తాగునీటి సరఫరాకు అంతరాయం ఏర్పడనుంది.
Movie Time..02.02
హైదరాబాద్: విద్యార్థులు క్రీడారంగంలో అవకాశాలను అందిపుచ్చుకోవాలని ఓయూ ఫిజకల్ ఎడ్యుకేషన్ విభాగాధిపతి ప్రొఫెసర్ సునీల్‌కుమార్ పేర్కొన్నారు. కాచిగూడ బద్రుకా కళాశాలలో రెండురోజులపాటు జరిగిన ఓయూ అంతర్ కళాశాలల మహిళల క్యారమ్స్ టోర్నమెంట్ ముగింపు కార్యక్రమంలో ఆయన పాల్గొని విజేతలకు బహుమతులు అందజేశారు. కార్యక్రమంలో బద్రుకా కళాశాల వైస్ ప్రిన్సిపాల్ వెంకటయ్య, ఫిజికల్ డైరెక్టర్లు రాజేష్, మనోజ్ తదితరులు పాల్గొన్నారు.
హైదరాబాద్: పేదింటి ఆడబిడ్డల వివాహాలకు ఆర్థిక సాయం అందజేస్తున్న ఏకైక రాష్ట్రం తెలంగాణ అని మంత్రి తలసాని శ్రీనివాస్ యాదవ్ పేర్కొన్నారు. గురువారం హైదరాబాద్‌లోని తన నివాసంలో కళ్యాణలక్ష్మి, షాదీముబారక్ లబ్ధిదారులకు చెక్కులను పంపిణీ చేశారు. తెలంగాణలో అమలవుతున్న సంక్షేమపథకాలు దేశంలో ఎక్కడా లేవని పేర్కొన్నారు. అన్ని వర్గాల అభ్యున్నతికి సీఎం కేసీఆర్ కృషి చేస్తున్నారని, ప్రజాసంక్షేమమే ప్రభుత్వ ధ్యేయమని స్పష్టంచేశారు.
హైదరాబాద్‌లోని గోదాంలపై తెలంగాణ ప్రభుత్వం కీలక నిర్ణయం తీసుకుంది. కొన్నింటిలో తరచూ అగ్నిప్రమాదాలు సంభవిస్తుండటంతో తనిఖీలకు సిద్ధమైంది. నిబంధనలు ఉల్లంఘించిన వారికి నోటీసులు జారీ చేయాలని నిర్ణయించింది. నోటీసుల తర్వాత కూడా మార్పు రాకపోతే క్రిమినల్ కేసులు నమోదు చేసేందుకు సిద్ధం అవుతోంది. దీంతో పాటు కమర్షియల్ ఎస్టాబ్లిష్‌మెంట్‌‌కు ఇక నుంచి పోలీసుల అనుమతి తప్పనిసరి చేయనుంది.
HYD : బడ్జెట్‌ సమావేశాల నేపథ్యంలో రేపు (శుక్రవారం) ఉదయం 9 గంటల నుంచి మధ్యాహ్నం 3 గంటల వరకు అసెంబ్లీ పరిధిలో ట్రాఫిక్ మళ్లింపులు ఉంటాయని ట్రాఫిక్ అడిషనల్‌ CP సుధీర్‌బాబు వెల్లడించారు. ఖైరతాబాద్, బషీర్‌బాగ్‌, రవీంద్రభారతి, మాసబ్‌ట్యాంక్‌, లక్డీకాపూల్‌, ఎంజే మార్కెట్‌, నాంపల్లి ప్రాంతాల నుంచి వచ్చే వాహనదారులు ప్రత్యామ్నాయ మార్గాల్లో గమ్యస్థానాలు చేరుకోవాలని సూచించారు.
HYD : ఆపరేషన్‌ స్మైల్‌లో భాగంగా జనవరిలో నెల రోజుల పాటు నిర్వహించిన తనిఖీలలో పోలీసులు, చైల్డ్‌, మహిళాశిశు సంక్షేమ శాఖ అధికారులతో కలిసి 1,279 మంది చిన్నారులను కాపాడారు. హైదరాబాద్ సిటీ కమిషనరేట్‌ పరిధిలో ప్రత్యేక స్మైల్‌ టీమ్‌లను ఏర్పాటు చేసి 450 మందిని, సైబరాబాద్‌లో పరిధిలో 829 చిన్నారులను కాపాడారు. బాలలను కార్మికులుగా నియమించుకున్న 149 మందిపై కేసులు నమోదు చేశారు.
హైదరాబాద్ : VST వద్ద గోదాంలో జరిగిన అగ్ని ప్రమాద ప్రాంతాన్ని మంత్రి తలసాని శ్రీనివాస్ యాదవ్ పరిశీలించారు. ఘటనకు గల కారణాలను ఆరా తీశారు. మంటలు అదుపులోకి వచ్చాయని చెప్పారు. తగిన జాగ్రత్తలు పాటించని కారణంగానే ఇలాంటి ప్రమాదాలు జరుగుతున్నాయని అన్నారు. నిబంధనలు పాటించని వ్యాపారులు, గోదాముల నిర్వహకులపై కఠిన చర్యలు తీసుకుంటామని హెచ్చరించారు. అగ్ని ప్రమాదాలపై ప్రజలకు అవగాహన కల్పిస్తామని వెల్లడించారు.
హైదరాబాద్ బాగ్‌లింగంపల్లిలో భారీ అగ్నిప్రమాదం జరిగింది. బాగ్‌లింగపల్లిలోని వీఎస్టీ సమీపంలో ఉన్న ఓ గోదాములో ఒక్కసారిగా మంటలు చెలరేగాయి. అందులో శుభకార్యాలకు ఉపయోగించే డెకరేషన్‌ సామాగ్రి ఉండటంతో పెద్దఎత్తున మంటలు ఎగసిపడుతున్నాయి. ఆ ప్రాంతమంతా దట్టంగా పొగలు కమ్ముకున్నాయి. సమాచారం అందుకున్న అగ్నిమాపక సిబ్బంది, పోలీసులు ఘటనా స్థలానికి చేరుకున్నారు. నాలుగు ఫైర్ ఇంజిన్ల సహకారంతో మంటలను అదుపుచేయడానికి ప్రయత్నిస్తున్నారు.
దేశంలో తృణధాన్యాల పంటల (మిల్లెట్స్‌) సాగు, వాటి ఆహారోత్పత్తుల వినియోగాన్ని ప్రోత్సహించేందుకు హైదరాబాద్ ప్రధాన కేంద్రంగా మారనుంది. రాజేంద్రనగర్‌లోని ‘భారత తృణధాన్యాల పంటల పరిశోధన సంస్థ’ ను ఈ పంటల సాగు, ఆహారోత్పత్తుల వినియోగం పెంచే కార్యక్రమాలకు నోడల్‌ ఏజెన్సీగా కేంద్రం ఎంపిక చేసింది. మనదేశంలో ఈ పంటల సాగుకు అధిక ప్రాధాన్యమిస్తున్నట్లు కేంద్ర బడ్జెట్‌లో తాజాగా ప్రకటించారు.
ఫిబ్రవరి 11న హైదరాబాద్‌లో ఫార్ములా ఈ- రేసింగ్ జరగనుంది. అందులో భాగంగానే హుస్సేన్ సాగర్ చుట్టూ 2.37 కిలోమీటర్ల మేర నిర్మించింది. అయితే ఈ రేస్ కారణంగా ట్యాంక్ బండ్ పరిసర ప్రాంతాల్లో ట్రాఫిక్ ఆంక్షలు విధించనున్నారు. ఫిబ్రవరి 5 నుంచి 11 వరకు తెలుగుతల్లి ఫ్లైఓవర్ నుంచి ఖైరతాబాద్ ఫ్లైఓవర్, మింట్ కాంపౌండ్ నుంచి ప్రసాద్ ఐమాక్స్ వరకు ట్రాఫిక్‌ను అనుమతించరు.
హైదరాబాద్‌లోని వనస్థలిపురంలో భారీ అగ్నిప్రమాదం చోటు చేసుకుంది. ఆటోనగర్‌లోని ఓ టైర్ల రీబటనింగ్ కంపెనీతో పాటు గోడౌన్‌లో కూడా భారీ ఎత్తున మంటలు చెలరేగుతున్నాయి. దీంతో పాటు దట్టమైన పొగలు అలుముకోవడంతో అక్కడి స్థానికులు ఉక్కిరిబిక్కిరి అవుతున్నారు. ఘటనా స్థలానికి చేరుకున్న అగ్నిమాపక సిబ్బంది మంటలను అదుపు చేస్తున్నారు.
హైదరాబాద్‌లోని హుస్సేన్ సాగర్‌లో సంగీత సవ్వడులు వినిపించనున్నాయి. రూ.17 కోట్లతో HMDA మ్యూజికల్ ఫౌంటెన్‌ ఏర్పాటు చేస్తోంది. ఆహ్లాదభరితమైన సంగీతం, లేజర్‌ షో సందర్శకులను ఆకట్టుకోనుంది. ఫిబ్రవరి నుంచి ప్రతి శని, ఆదివారాల్లో ఈ మ్యూజికల్ ఫౌంటేన్ ప్రదర్శించనున్నారు. నాలుగు వందల ఏళ్ల హైదరాబాద్ చరిత్ర, సాంస్కృతిక విశేషాలు, వారసత్వ కట్టడాల ప్రత్యేకతలను ఈ ప్రదర్శన ద్వారా ఆవిష్కరిస్తారు.
తెలంగాణ గవర్నర్ తమిళిసైపై అనుచిత వ్యాఖ్యలు చేసిన ఎమ్మెల్సీ పాడి కౌశిక్ రెడ్డిపై ఓయూ విద్యార్థి జేఏసీ నేతలు ఫైర్ అయ్యారు. ఓయూ NCC గేటు ఎదుట ఆయన దిష్టిబొమ్మ దహనం చేశారు. వెంటనే అతన్ని ఎమ్మెల్సీ పదవితో పాటు, బీఆర్ఎస్ పార్టీ నుంచి తొలగించాలని డిమాండ్ చేశారు. వెంటనే గవర్నర్‌కు క్షమాపణ చెప్పాలని విద్యార్థి నేతలు డిమాండ్ చేశారు.
షిర్డీ సాయిబాబాకు హైదరాబాద్‌కు చెందిన ఓ భక్తురాలు బంగారు కమలాన్ని కానుకగా ఇచ్చారు. నాగం అలివేణి 233 గ్రాముల బంగారంతో తామర పుష్పాన్ని చేయించారు. దాన్ని సాయిబాబా సంస్థాన్‌కు అందజేశారు. మధ్యాహ్నం, సాయంత్రం హారతి సమయంలో వీటిని బాబా వస్త్రంపై ఉంచనున్నట్టు నిర్వాహకులు తెలిపారు.
హైదరాబాద్: VRA లకు సీఎం కేసీఆర్ ఇచ్చిన హామీలను తుంగలో తొక్కారని VRA జేఏసీ రాష్ట్ర కోకన్వీనర్ రమేష్ బహదూర్ మండిపడ్డారు. సీఎం 2017లో వీఆర్ఏలకు అసెంబ్లీలో ప్రకటించిన హామీలను అమలు చేయాలని డిమాండ్ చేస్తూ బుధవారం హైదరాబాద్‌లోని ఇందిరాపార్క్ వద్ద ధర్నా చేశారు. అర్హత కలిగిన వీఆర్ఏలకు వెంటనే ప్రమోషన్స్, సమ్మెలో పాల్గొని మృతి చెందిన కుటుంబంలో ఒకరికి ఉద్యోగం ఇవ్వాలన్నారు.